کہیں کوں این آر او ڈیسوں نہ چارٹر آف ڈیموکریسی دے ناں تے مک مکا دی اجازت ڈیسوں ، وزیراعظم عمران خان دا کوالالمپور اچ پاکستانی کمیونٹی نال خطاب

کوالالمپور ۔ 21 نومبر (اے پی پی) وزیراعظم عمران خان آکھیے جو کہیں کوں این آر ڈیسوں نہ چارٹر آف ڈیموکریسی دے ناں تے مک مکا دی اجازت ڈیسوں ، اپوزیشن کوں حکومت دے خاتمے دی بہوں جلدی اے ، انہاں کوں ڈر اے جو جتنیدیر عمران خان حکومت اچ ہوسی انہاں سانگے خطرے دی گھنٹی وجدی رہ ویسی ۔ہر سال پاکستان اچ 10ارب ڈالر دی منی لانڈرنگ کیتی ویندی اے ۔بدھ کوں ملائیشیا دے شہر کوالالمپور اچ پاکستانی کمیونٹی نال خطاب کریندے ہوئیں وزیراعظم عمران خان آکھیا جو حکومتی اقدامات پاروں منی لانڈرنگ کوں بہوں اوکھا بنڑا ڈیسوں ،حکومت بر آمدات اچ ودھارا ،سرمایہ کاری دے ودھارے ،ترسیلات زر دے عمل کوں قانونی تے باضابطہ بنڑاونڑ تے منی لانڈنگ دے خاتمے دے چار نکاتی پرورگرام دے ذریعے معیشت کوں بہتر بنڑاونڑ دی پالیسی تے گامزن اے ،پاکستان اچ جتنا پیسہ آونڑ آلا اے ایندے نتیجے اچ کڈاہیں وی قرضیں تے امداد دی ضرورت کائناں رہ ویسی بلکہ اساں خود غیر ملکاں کوں قرضے ڈیسوں ، اگلے ہفتے حکومت ولوں غربت دے خاتمے ہک وڈے پروگرام دا اعلان کیتا ویسی ،سرمایہ کاراں کوں ملک اچ سرمایہ کاری تے تجارت اچ سوکھ پیدا کرنڑ سانگے وزیراعظم آفس اچ ہک دفتر دا قیام کیتا ویندا پئے ،لوک ،اداریں تے قوماں دی زندگی اچ اُ چ جھک آندی رہ ویندی اے ،او ایں سانگے آندی اے جو اللہ دی طرفوں ہک پیغام ہوندے جو تساں غلطی کریندے پیو اینکوں ٹھیک کرو ،جیرھیاں قوماں اپنڑیاں غلطیاں ٹھیک کائنی کریندیاں اللہ سئیں انہاں کوں برباد کر ڈیندے جیرھیاں قوماں اپنڑیاں غلطیاں توں سکھ تے اصلاح تے رستے تے چلدن او مضبوط ہوندن ۔ وزیراعظم آکھیا اج دا ڈینھ اساں کیتے مبارک ڈینھ اے ، نبی کریمﷺ اے سبق ڈتا جو قوم او ہوندی اے جیرھی اپنڑے کمزور طبقات دا خیال رکھے تے انہاں بارے احساس تے رحم دلی دا جذبہ رکھے ۔انہاں بنیاداں تے آپﷺ ریاست مدینہ دی بنیاد رکھی جیں اچ انسانیت کوں مقدم رکھیا گے ۔انہاں اساکوں اے سبق سکھایا جو وسائل کائنی بلکہ احساس تے رحم دلی دے ذریعے کامیابی کیویں حاصل کیتی ونج سگدی اے ۔انہاں معاشرے دے کمزور طبقات کوں ریاست دا حصہ بنڑایا تے ایندی بنیاد تے ہک قوم تشکیل ڈتی ۔ایہا وجہ اے جو دنیا دی تاریخ اچ اتنے تھولے عرصے اچ کہیں قوم اتنی ترقی کائنی کیتی ۔وزیراعظم آکھیا جو قرآن کریم دی تعلیمات تے نبی کریمﷺ دے اسوہ حسنہ توں مرتب کردہ رہنما اصولاں دی بنیاد تے اساں پاکستان کوں اگی تے گھن تے ونجنڑاں اے ،اے ایجھا پاکستان ہوسی جتھاں معاشرے دے کمزور طبقات کوں سہولتاں ڈتیاں ویسن ۔